Иахьа Аҟәа Ацәыргақәҵатә зал хадаҟны имҩаԥысуеит "Аԥсны. Арӡынба. Ахақәиҭра" ҳәа захьӡу ашәҟәы аӡыргара, убасгьы иаартхоит Аԥсны раԥхьатәи ахада изку афотоцәыргақәҵа. Арҭ аусмҩаԥгатәқәа еиҿыркаауеит Гәыгәыца Џьыкырԥҳа, Кьасоу Ҳагба, Аслан Аҩӡба.

Сергеи Дбар ихьӡ зху Аԥсны Аџьынџьтәылатә еибашьра аҳәынҭқарратә музеи аиҳабы Гәыгәыца Џьыкырԥҳа Аԥсуа радио аефир аҟны еиҭалҳәеит ашәҟәы шеиқәыршәоу,  ацәыргақәҵа шеиҿкаау атәы.